حكايات زمان العفيفه المظلومه

وعلي راسه جابت ولد تاني بالسابع وسماتو مكتوب وكبروا ماشاء الله هدوك الوليدات مقدر ومكتوب وبدى هداكة بيت الشعر عامر بيهم وبحسهم وجدتهم فرحانة بيهم قريب اطير وبوهم واميمتهم يلعبوا عليهم ويمشو للخرفان.. والايام فيسع ماتمشي وحملت اميمتهم مرة ثالثة وفرحتهم بعريسة حلوة كي امها وسمتها وعد وعاشوا العويلة متهنيين وهدوكة الاولاد خلولهم جو البر ربيع مزهر بضحكهم ولعبهم وجريهم في الخلا وبوهم كل ماتنقص عليهم حويجة ياخد من السعي اللي ماشاء الله ربي مباركلهم فيه يبيعه في المدينة ويشريلهم اللي ناقصهم....
اما وخيينها اول مااختهم هربت وخلتهم ماخلوا مكان مامشاولو ومادوروش فيه لكن ربي مايرضاش بالظلم وعارفها طاهرة وعفيفة ماخلاهمش يلقوها كان الارض انشقت وبلعتها وقالوا ماناش مروحين لقريتنا الا مانمسحو عاړنا ومانخلوش الناس تضحك علينا وقعدوا يدوروا مع بعض كل مرة يمشوا لمكان والحراث كان يمشي ويدور معاهم وكل ما يلقوا بيت شعر في الخلا يرتاحوا عندهم ليلة ويباتوا 
وتاني يوم الصبح يتسقدوا تاني وليلة من الليلات طلعوا من قبيلة مالقوش فيها اختهم وتسقدوا وليل عليهم الليل يشوفو في ضي فڼار من بعيد ضاوي قالو خلي نمشوا نرتاحوا الليلة عنده وغدوة انكملوا طريقنا واول ماوصلوا لبيت الشعر طلعلهم صاحبه .ورد عليهم السلام ورحب بيهم وكان معاه وليداته كي السعد يلعبوا هني ويجرو هني دخلهم وصبلهم القهوة ومشي خدي موس وذبحلهم خروف ودخلو لامو ومرتو وقالهم وجدو للضيوف العشاء تعشو وسهرو وقصرو وبعدين حطو روسهم ورقدو والصبح فطروا حليب وجبنة وزبدة وحلفلهم صاحب البيت مايروحوش من عنده الا بعد ثلاثة ايام كيما عوايد العرب المتعارف عليها في هداكة الزمان . الخوت شبحوا لبعض مش راضيين وسكتوا وقعدوا معاه لقريب العصر وبعدين قالوله كثر الف خيرك ماقصرتش لكن سامحنا لازم نمشوا لينا سنين رايحة منا حاجة واحنا ندوروا عليها لازم نمشوا !! قلهم الوقت متأخر وهادي صحراء باتوا عالاقل الليلة وغدوة من الصبح ربي يسهل عليكم ويفتحها قدامكم ووصي امه ومرته عالعشي وبعد العشي هدوك الذراري قعدوا ماشيين جايين بين امهم والضيوف عند بوهم يلعبوا مع الضيوف والضيوف حبوهم كأنهم يعرفوهم من سنين وبعدين ناض الراجل بيسلي ضيوفه ويغيرلهم جوهم زمان لا في تلفزيونات ولا شيء يحكوا في حكايات وخرافات لبعض ويسهروا ويضحكو عالحكاية قالهم شن رايكم بنحكيلكم حكاية قالوله اتفضل حتى ولادو هما فرحوا وقعمزوا بحدا الضيوف يسمعوا الحكاية 
قالهم وحدوا الله !! قالوله لا اله الا الله
قاللهم زمان كنت بائع متجول نبيع ونشري في البضايع وماخليت نجع مامشيتلوش وفي يوم طالع مع صحابي وانقطعت بينا الطريق واميتنا وماكلتنا تمت وواحد من صحابي من العطش والجوع قال معاش نقدر نمشي خلوني وكملوا طريقكم مارضيناش نخلوه وطلعنا ندور علي نجعقريب وبعدين شفت في ضي فڼار من بعيد قلت لصحابي نمشي لصاحب بيت الشعر ونطلب منه يعطينا ماناكلوا مشيت لهداكة البيت لقيت بنية ربي يستر عليها طلبت منها خبزة خشت واعطتني صرة خبزة وكيف بنرجع لصحابي نبح علياكلب في الظلام مانندريش علي روحي لين لقيت روحي طايح في بير مهجور مافيشي الماء ناديت بنية الناس وقلتلها نادي حد يطلعني قتلي خوتي السبعة في الحرث ومافيش غيري وجابتلي حبل وربطتو في وسطي وهيا بطلعني طاحت معاي في البير !!!! الولاد سمعوا الكلام من هني وطلع كل واحد سيفه وناضوا وقفو ماخلوشي حتى يكمل كلامه .
زعمة شن بيديروله الخوت السبعة بيقطعوله راسه ولا بيسمعوا باقي القصة